نقدم خلال الفترة القادمة عدد من التوصيات الفنية لخدمة المزارعين عبر عدد من النصائح ضمن مبادرة ( دائماً معاك ) برعاية المهندس محمود عطا رئيس الادارة المركزية للبساتين والمحاصيل الزراعية وهي:
- اهتم انك تزود المقاومة الطبيعيه للنبات عن طريق رفع قدرة الجهاز المناعي للنبات علي مقاومة الامراض الفطريه والحشرية والفيروسية والنيماتودا و تحسين الصحه العامه للنبات .
أهم مركبات المبيدات لرفع قدرة الجهاز المناعي للنبات
١- البولي أمنيات مثل ( اسبرمين – اسبرميدين ) .
٢-سيتوكينين فى صورة ( سيتو بوتاسيوم ) .
٣- السيلينيوم البيطري أو الزراعي .
٤- استخدام المبيدات الحيوية فهيا لا تسبب اجهاد للنبات مثل المبيدات الكيميائية.
٥-السيليكون. فى صورة (سيليكات بوتاسيوم) .
٦- الساليسيك ( الاسبرين ) .
٧- الهيوميك اسيد .
٨- الفولفيك اسيد .
٩- الماب MAP والداب DAP .
١٠- حامض البرولين .
١١- الأحماض الأمينية .
١٢- طحالب بحرية .
١٢- حمض الستريك ( ملح ليمون ) .
١٤- استخدام العناصر الصغرى .
١٥- كالسيوم برون
١٦- هـ سلنيوم
١٧- فيتامين B12 وفيتامين C
١٨- حمض التربتوفان
١٩- حمض الجلوتاميك
٢٠ – سيتوشان
٢١- حمض بترسين
٢٢- استخدام بكتريا EM1
«هذه المركبات للمساعدة في تقليل استخدام المبيدات وتقليل التكاليف» .
نكمل التوصيات:
- استخدامك للفيتامينات مهم جدا لانها بتقوم بدور مانع الاكسده .
- إستخدام الفيتامينات بهدف منع تكون المواد الناتجه عن احساس النبات بالاجهاد وبالتالي تساعد النبات علي تحمل ظروف الاجهاد بالاضافه لدورها في تنشيط عمل الانزيمات داخل النبات .
- إستخدام العناصر الصغرى في النص الاول من عمر النبات لان رش العناصر الصغرى عامل زي الطالب اللي بيذاكر اول بأول أكيد بيكون أشطر لأن كتير من اللي بيذاكر بعد نص الترم وطبعا اللي ذاكر ذاكر
- حاول الإستفادة باقصى قدر ممكن من العناصر المدمصه علي حبيبات التربه والمخزنه من فتره او اللي التربه غنيه بيها بالفعل.
- يتم ذلك عن طريق استخدامك لمركبات الهيومك والفولفيك و الكبريت الزراعي والجبس الزراعي اثناء الخدمه واستخدامك للاحماض قدر المستطاع .
- الكالسيوم بطئ الحركه من العناصر المهمه جدا واللي بتزود صلابة جدر الخلايا وبالتالي مينفعش ترشة في التلت الاخير من عمر النبات لاول مره فى الموسم وتنتظر منه النتيجه المرضيه !
- استخدام الكالسيوم في التلت الاول من عمر النبات وكرر الرشه مرتين كمان ع الاقل او حسب الاحتياج .
- في المحاصيل المزهره اهتم جدا برش المولبدنيوم و البورون والزنك والمنجنيز عشان تحصل علي حبوب لقاح افضل و متوك افضل و اخصاب افضل وبالتالي عقد افضل وافضل .
- عند رش المبيد الحشري خصيصا والمبيدات بشكل عام التزم بالمعدلات المكتوبه علي العبوة لان الشركه المنتجه توصلت للمعدلات المطلوبة بالقضاء علي الآفة ده عشان تحقق المعادله الاهم وهي افضل نتيجه للقضاء علي الافه مع اقل تكلفه مع اقل ضرر اجهاد واقع علي النبات نتيجه الرش بالمبيد.
- اي زيادة أو الإفراط في المعدلات المذكورة من المبيدات لا يفيد في قتل الافه ويحول الافه كي تكون أكثر شراسة فيما بعد علي المدى البعيد ،مما يؤدي في النهاية علي عدم فعالية المبيدات في مكافحة الآفات بسبب الإسراف في الإستخدام.
- استخدامك لمعدل اعلى من الموصى به في المبيدات = استخدامك لمعدل اقل من الموضى بيه
- لا يعني انك ترش المبيدات كل يوم ان ذلك هو افضل طريقه للقضاء علي الافه ولكن بالعكس انت تتسبب في إجهاد النبات وتهدر فلوسك علي الارض وبتزود تكاليفك جدا بدون مردود .
- بلاش الخلط في الرش عشان توصل لافضل نتايج ممكنه أو التزم بتعليمات خلط المبيدات من خلال التوصيات الفنية للجنة مبيدات الآفات الزراعية.
- لا يعني ان تركيز مبيد وان مادته الفعاله اعلي من ٥٠ ٪ انه يحقق نتائج افضل من المبيد اللي يحمل مادة فعاله اخرى وتركيزها اقل من ٥٠٪ .
- اساس النبات وقوته في جذوره .. فلازم تهتم جدا بالصرف الجيد و الحرث الجيد والخدمة الجيدة والرى المنتظم
- تحذير من إستخدام سماد بلدي غير متحلل بحجة انك معندكش مكان تكمر فيه نواتج المواشي فبتستخدمها اول باول بدون تحلل لان ذلك يسبب حدوث افات كتيرة سواء حشريه او فطريه او بذور حشائش.
- ضرورة إدخال ثقافة استخدامنا للمركبات الخاصه بضبط ph محلول الرش قبل اضافة مخلوط الرش او المبيد او المغذى المستخدم – ده هيوفر علينا كتير جدا وهيعظم جدا جدا جدا من قوة المركب المستخدم في الرش وياريت نهتم بيها نفس اهتمامنا باختيار نوع المبيد اللي هنرشه .
- توقيت الرش ودرجة حرارة الجو في اليوم من اهم العوامل اللي هتنجح عملية الرش و هتديلك افضل النتايج المرضيه .
- للاسف معندناش مركب حيوي مصري قوي لان معندناش التقنيات اللي تخلينا ننتج مركب حيوي قوي يكافئ المبيدات الكيماويه .. عشان كده بلاش تجازف وترش مركب حيوي عشان تكافح افه موجوده بالفعل عندك .
- الاحماض الامينيه بتبدأ تتكسر عن ph4 فلو عاوز تاخد افضل النتايح منها استخدمها رش فقط مع الاهتمام بالنقطه اللى قبل قبل ده.
- عدم رش احماض امينيه ولا تسميد او رش ازوت وقت الشك في احتمالية وجود اصابه بالامراض .
- العطش وعدم انتظام الري من اهم العوامل الكفيله بتدهور حالة النبات وهزيانه اهتم بضبط الري اقصى اهتمام واديله أولويه .
أعد التوصيات المهندس عماد مهدي خبير زراعي وصاحب مشاتل الفيروز المتخصصة فى إنتاج نباتات الفراولة ( نباتات الامهات – نباتات الفريش – نباتات الفريجو ) واستشارى اعداد وتطوير مزارع فراولة والمدير التنفيذي لقطاع الفراولة بشركة جرين بوينت للاستيراد والتصدير والتوكيلات التجارية ومدير قطاع الفراولة بشركة اجروبالم للاستثمار الزراعى .
