حكايات بيطرية…مع الدكتور محمد مصباح: أفضل تغذية لإنتاج البان جيدة من الماشية؟

ثروتك كلها مجمعها في تربية الماشية يبقى لازم تحميها و الحماية مش إنك تقفل عليها الباب كويس و تخاف عليها من العين و الحسد…. لا خالص …..لازم تحميها بإنك تهتم بالتغذية الجيدة لان التغذية هي المسؤلة عن بناء مناعة الجسم العامة و هي الطريق لانتاج لبن بكمية كبيرة و جودة عالية .

لما تعلف عجل تسمين اعرف وزنه كام لان العلف كميته و تركيزه حسب الوزن فلو افترضنا إن وزن العجل 250 كجم قائم إذا هيتم تغذيته علي علف بروتينه 16% و كل ما زاد وزن الحيوان ليصل إلي 450: 500 تقل نسبة البروتين إلى 14% و كمية العلف المركز تتحسب 2% من وزن الحيوان و الألياف 1:1.5 % من وزن الحيوان.

بمعنى إن كل 100 كجم قائم من وزن الحيوان ليها 2 كجم في اليوم من العلف المركز و حتي حيوانات اللبن تغذيتها تعتمد اساسا علي كمية اللبن الي بينتجها الحيوان فعلي سبيل المثال اذا كنت تمتلك جاموس عالي الادرار بيحلب 15 كجم في اليوم يتم تغذيته علي علف 19% بروتين و هياكل 8 كجم في اليوم علي 1 كجم تبن أو قش و في وجود البرسيم هياكل من البرسيم 55 كجم في اليوم اما في وجود السيلاج هياكل 27 كجم من السيلاج في اليوم

اهتم جدا بجودة التغذية و اتحكم في كميات العلف بناء علي الوزن و انتاج اللبن.

أ.د.محمد مصباح الديسطي

المدير الفني- معهد بحوث الصحة الحيوانية المنصورة