د محمود حمدي يكتب: «حلول تبدأ بالرحمة»…مسؤولية المجتمع لحل مشكلة كلاب الشوارع

وكيل نقابة الأطباء البيطريين – مصر

كلنا بنشوف الكلاب الضالة في شوارعنا كل يوم، يمكن بعض الناس تبص لهم بخوف، وبعضهم يشفق عليهم، لكن الحقيقة إنهم جزء من واقعنا، والتعامل معاهم لازم يكون فيه “رحمة” قبل أي حاجة تانية. ديننا الحنيف وأخلاقنا بيأكدوا إن الرفق بالحيوان مش رفاهية، ده واجب إنساني وأخلاقي، لأنهم في النهاية أرواح لها حق في الحياة والأمان.

حل المشكلة مش هييجي من طرف واحد، لكنه محتاج تضافر جهود الجميع: الحكومة، منظمات المجتمع المدني، الجامعات، نقابة الأطباء البيطريين، والمواطنين نفسهم. وده بالظبط اللي بيأكد عليه الخبراء والهيئات الدولية.

الاستراتيجية الدولية اللي أوصت بيها منظمات عالمية زي منظمة الصحة العالمية ومنظمة الرفق بالحيوان، بتقوم على 3 محاور رئيسية: التطعيم – التعقيم – التوعية،  الفكرة هنا إننا نطعم الكلاب ضد السعار والأمراض، ونعمل عمليات تعقيم عشان نقلل تكاثرهم، وفي نفس الوقت ننشر الوعي بين الناس عن أهمية التعامل المسؤول معاهم.

هنا بييجي دور نقابة الأطباء البيطريين بالتعاون مع الهيئة العامة للخدمات البيطرية ، اللي ممكن تقود حملات واسعة للتطعيم والتعقيم، بالشراكة مع الهيئات الحكومية والجمعيات، وبالتعاون مع الجامعات لمنح فرص تدريب عملي للأطباء البيطريين الجدد. وده هيكون من خلال مشاركتهم في العمليات الجراحية بإشراف أطباء بيطريين كبار وأصحاب خبرة، عشان الخريجين يكتسبوا مهارات عملية وفي نفس الوقت نخدم قضية مهمة.

كمان، نشر التوعية في الجامعات والمدارس هيساعد كتير في تغيير سلوك المجتمع تجاه الكلاب، وهيخلينا نتعامل معاهم بوعي ورحمة بدل العنف والخوف.

الموضوع مش رفاهية ولا حاجة جانبية، لكنه قضية صحة وأمان مجتمعي. وكل ما نتحرك أسرع وبشكل منظم، كل ما نقدر نحافظ على حياة البشر والحيوانات مع بعض، في توازن يحترم كل الكائنات اللي بتشاركنا نفس الأرض.