د حامد الأقنص يكتب: كيف تحقق الأرباح من تربية الماشية عن التغذية الصحيحة؟
خبير في صحة الحيوان – مدير مديرية الطب البيطري بالإسماعيلية – وزارة الزراعة – مصر
انتاج أعلاف رخيصة الثمن غير التقليدية ذات جودة عالية تؤدي دور الأعلاف العادية في تغذية الماشية وذلك عن طريق تخفيض نسب الذرة الصفراء وفول الصويا في العلائق الى ادنى مستوى، و احلال مكونات اخرى فى العلائق بدلا منهم مما يؤدي الى خفض تكاليف التغذية و بالتالي الى الربحية.
إذن ماهى هذة المكونات التي سوف تحل مكان الصويا و الذرة؟
ازاي نرفع الكفاءة الغذائية للأكل !!!
ازاي ننتج كيلو لبن من بقرة بأقل كمية مادة جافة واقل تكلفة وكذلك بالنسبة للتسمين .
لان ده استثمار …. دفعنا كام في التغذية ومصاريف التشغيل وأخدنا كام في الآخر كمكسب.
سواء في مزارع الحلاب او التسمين ولكن مزارع الحلاب لها توابع (عجول رضيعة – عجول نامية وتربية عجول او عجلات – عجلات تحت التلقيح وعجلات ملقحة وعجلات عشار – وابقار جافة في انتظار موسم الحلب الجديد)…
ماهي الكفاءة الغذائية؟
واحد كيلو مادة جافة ينتج كام كيلو لبن.
البقرة بتاكل سيلاج وذرة وبرسيم حجازي او بلدي وصويا ده بنسميه الاكل as fed .
لكن معظم المزارع بتعمل خلط بال mixer للعلف المركز (الذرة والصويا والنخالة) مع ال forage ( الفا الفا او برسيم او سيلاج ) معاه roughage مثل كورن القمح.
Total mixed ration :- او العليقة المخلوطة
كل قطمة فيها معظم مواد العلف لتجنب مخاطر الحموضة وبترفع الاستفادة من الاكل ومعدل التحويل بيزيد بالنسبة للبن واللحم .
التحويل = كم كيلو لبن تم انتاجه من البقرة / كمية المادة الجافة التي اكلتها البقرة (dry matter intake).
- البقر لازم يقوم بعملية الاجترار والتي تؤدي الى افراز كمية كبيرة من اللعاب لتتعادل مع الاحماض اللي هتطلع في الكرش نتيجة التخمر fermentation .
- البقرة عالية الادرار تدور 180لتر من اللعاب في اليوم لكن عجل التسمين يدور 60-80لتر لعاب في اليوم.
- اللعاب مهم جدا عشان كده لازم يتوفر لكل بقرة مكان ومساحة على الطوالة وداخل الحظيرة لان البقرة لو مش عارفة تقف على الطوالة وبتجد معاناة في الوصول للعليقة والاكل هتاكل كمية كبيرة مرة واحدة ويحصل حموضة ACIDOSIS .
- البقرة الحلاب بتاكل 5ساعات تروح فيهم للطوالة 30مرة فتجد معاناة فتاكل غلط.
- وكمان الأرضية لازم تبقى نظيفة وناعمة ومستوية عشان البقرة تجتر لمدة 10ساعات (6ساعات وهي نايمة و4ساعات وهي واقفة).
- لابد من دفع الاكل امام الحيوان كل ساعتين ويتعمله اعادة خلط تاني ويكون الاكل متاح خلال 24ساعة سواء تسمين او لبن … لازم الحيوان يشبع والا هياكل غلط.
بمعنى لو الاكل نزل وحصل تدافع من الحيوانات على الطوايل يبقى تأكد ان الاكل هيتهضم غلط ….لازم ينزل لعاب كتير ويختلط بالطعام ويتهضم الاكل بشكل صحي .
ممكن نشيل الذرة والصويا وناكل سيلاج ودريس وتبن قمح ويبقوا موجودين 24 ساعة.
- مهم جدا تنظيف الطوايل امام الابقار وكل حيوان ياخد المساحة المخصصة ليه (60سم لعجول التسمين – 75سم للحلاب) امام الطوالة.
السيلاج:-
اختيار الارض لابد ان تكون خالية من الحشائش والنباتات الجافة لعدم نمو الفطريات او وجود سموم فطرية .
وش كومة السيلاج يتقطع كويس من اليمين للشمال ومن فوق لتحت حتى لا يتعرض السطح للبكتيريا والعفن.
اضافات الاعلاف :-
اختيارها مهم ولازم يكون فيها صفات هامة مثل أن تحافظ على ال PH بتاعة الكرش ثابتة وتقلل تراكم اللاكتات lactate جوه الكرش وتقلل الامراض الايضية وبترفع nitrogen utilization وتزود هضم الالياف وتحسن الاستجابة المناعية.
ده بالنسبة للحاجات التقليدية…… يوجد حاجات اخرى غير تقليدية
1- تفلة البرتقال أو قشر البرتقال:-
- اعرف مزارع حاليا بتاكل منها يوميا من 100-150طن.
- 5كيلو قشر برتقال = كفاءة 1كجم ذرة.
- ممكن ان يتم عمل سيلاج منها بالخلط مع تبن القمح.
- (لو تم عمل سيلاج من تفلة البرتقال لوحدها بيحدث تخمر عالي جدا نتيجة السكريات والبكتين وينتج حمض اللاكتيك (LACTIC ACID) وهو سام للفلورا الموجودة بالكرش ) فالافضل ان يتم خلطها مع تبن القمح لانه بيشد السكر والرطوبة الموجودة في البرتقال وبيبعد الروابط الموجودة بين السليلوز والليجنين .
*يبقى لو حبيت اعمل سيلاج من قشر البرتقال لازم اضيف اليه تبن قمح بنسبة 20% .
80 كجم قشر برتقال + 20كجم تبن قمح.
2- البنجر / تفلة البنجر :-
- سعرها مقبول.
- كيلو بنجر + كيلو ذرة يعادل كفاءة 2كيلو ذرة.
- اذا كان الذرة بها نشا المهمة لادرار اللبن فتفلة البنجر بها بكتين حيث ان تخمر البكتين في الكرش يعادل تخمر النشا في الكرش والامعاء.
3- تفلة الطماطم :-
- بها 20% بروتين و اكثر من 10% دهون .
- عجل التسمين الهولشتين متعب في تسمينه بيحتاج 6كيلو ذرة ……صعبة في التكاليف.
- هناك مزرعة استخدمت 15كيلو (5كجم تفلة طماطم + 5كجم برتقال + 5كجم تبن قمح ) (بدون صويا او ذرة في العليقة) وصلت لمعدل تحويل كيلو في اليوم مقابل تكلفة لا تزيد عن 45جنيه.
- تفلة الطماطم تتواجد في شهر يونيه بكثرة وممكن تتعمل سيلاج بالخلط مع تبن القمح بنسبة (80: 20) ولازم يتخلطوا في mixer .
- 80% طماطم + 20% تبن.
- اهم حاجة في السيلاج اننا نطرد الهواء ونضغط بلودر او اي حاجة ثقيلة في المزرعة ونغطيه ببلاستيك رقيق سمكه 60ميكرون وفوقه بلاستيك تاني سمكه 120ميكرون ونغطي باي حاجة ثقيلة لكي يتخمر ويتحفظ .
4- البطاطس والبطاطا:-
- نقطع البطاطا لقطع صغيرة chopping وتتخلط مع تبن القمح بنفس النسبة 80: 20 لان البطاطا بها 17-18% مادة جافة DM.
عايزين نوصل الى زيرو ذرة وزيرو صويا في مزارع الحلاب والتسمين .
في مزارع ومحاجر كانت زيرو ذرة وزيرو صويا في الفترات اللي فاتت.
اي حاجة فريش وموجودة بكمية كبيرة في فترة صغيرة ممكن تتعمل سيلاج لاستخدامها طول السنة وميزة السيلاج ان لو اي مادة علف فيها مشكلة هتتكسر اثناء التخمرات وهتبقى آمنة أثناء الأكل ، مثل مصاصة القصب – بنجر السكر .
– تفلة الرمان لازم تنعم الاول وتتقطع وتتخلط – فيها tannine بيزود ال by pass protein يعني لو في بروتين هيتكسر في الكرش بيتغلف ويتهضم في الامعاء.
طيب ياد. حامد ايه رأيك في المولاس…..
المولاس موجود بس سعره غالي فلو بتاكل برتقال ممكن تأجل المولاس لان البرتقال به سكر .
أهم البدائل المستخدمة كبديل للذرة:
1- الشعير: يستخدم بعد طحنة وهو يحتوي على 75% من الطاقة الموجودة في الذرة ويستخدم في العلايق كبديل للذرة بنسبة 75% من استعمال الذرة وذلك في المناطق التى يتوفر فيها الشعر بنسب كبيرة ورخيصة الثمن
2 – الذرة العويجه : او الدخن تقريبا طاقتها مثل الذرة يتم طحنها للحصول على حبيبات كبيرة الحجم وتستخد كبديل للذرة في الدواجن وهي متوفرة بطريقة كبيرة في صعيد مصر و هي رخيصة جدا
3 – الشوفان : طاقة تعادل 75% من طاقة الذرة وممكن استخدامه كنسبة 50% من الذرة المفروض وضعة ويجب طحنه جيدا ويمكن استخدامة في علايق الدواجن و الحيوانات
4 – كسر القمح : مخلفات المطاحن الغير صالحة لصناعة الخبز طاقة مثل طاقة الذرة وبروتينه اعلى من الذرة يصل الى ( 15%-17% )
5 – مخلفات مصانع البسكويت و المكرونة : وهي تكون قريبة من طاقة الذرة وقشر البطاطس و البطاطا
النسب المفروض نضعها في التركيبة حوالي 25% من اجمالي كمية الذرة
البدايل المستخدمة كمصدر للبروتين كبديل الفول الصويا:
- كسب جلوتين الذرة : ( 50% : 60% ) بروتين ولكن سعرة غالي و ممكن استخدامة 30% من الصويا
- كسب الجوار : اللي البذور بتاعتة بيخرج منها الصمغ العربي وموجود في وجه قبلي كتير و يحتوي على 30% بروتين – ممكن استخدامة كبديل للفول الصويا نسبة 15%
- كسب بذرة عباد الشمس : 33% بروتين – ويمكن ان يحل مكان الصويا بنسبة 50%
- كسب السمسم : يحتوي على 45% بروتين – وممكن ان يستخدم مكان الصويا بنسبة 25%
- كسب الفول السوداني : 40 % بروتين – ممكن ان يستخدم مكان الصويا بنسب تصل الى 50% ( وهى رخيصة الثمن )
- كسب الجوجبا : وهو نبات يزرع في الوجه القبلي ويحتوي على بروتين 35% وعالي في الحمض الاميني الليسيك وممكن استخدامة مكان الصويا بنسبة 25%
- كسر الارز : زي الذرة وممكن استخدامة مكان لذرة بنسبة 35%.
- كسر الفول البلدي : نسبة البروتين 30% مصدر جيد للفسفور و عالي الطاقة ولكنة فقير جدا في الكالسيوم ويمكن استخدامة بنسبة تصل الى 25% من الصويا
- البطاطس : 10% بروتين في المادة الجافة – تستخدم بعد غليها (سلقها ) وممكن تستخدمها في العليقه بنسبة 5%.
- مخلفات مصانع البيرة : بعد صناعة البيرة يتبقى جزيرات الشعير وتستعمل كمصدر للبروتين لتربية الماشية وهي غنية جدا في فيتامين ب المركب – ممكن الاضافة بنسبة 10% للعليقة .
